Kuri uyu wa 29 Kanama 2021, Mu Murenge wa Mukindo habereye igikorwa cyo gusoza icyiciro cya mbere cy’abari mu rugendo rw’isanamitima mu rwego rw’ubumwe n’ubwiyunge.
▪ Ni gahunda yo guhuza no kwigisha abakoze jenoside yakorewe abatutsi n’abayirokotse hagamijwe ubumwe n’ubwiyunge mu banyarwanda. Iri shuri (urugendo) rimaze amezi 6, abashoje uru rugendo rw’isanamamitima muri iki cyiciro bagera kuri 452. Abakoze jenoside basabye imbabazi ni 242 naho abayirokotse batanze Imbabazi ni 210 bose bo mu Murenge wa Mukindo. Uru rugendo rumaze ayo mezi yose rwaberaga kuri Paruwasi Gatulika ya Magi aho mu Murenge wa Mukindo.
▪ Umuhango watangijwe n’igitambo cya Misa yasomwe na Musenyeri wa diyosezi ya Butare Msgr Rukamba Philipo hanatangwa bibiliya ku bantu bose bitabiriye icyo gikorwa cy’isanamitima.
▪ Umushyitsi mukuru muri uyu muhango yari Umuyobozi w’Akarere wungirije ushinzwe iterambere ry’ubukungu Bwana Habineza Jean Paul ari kumwe n’uhagarariye commission y’ubumwe n’ubwiyunge Madamu Mukayiranga Laurence, abayobozi b’inzego z’umutekano mu Karere, uhagarariye umuryango wa bibiliya mu Rwanda Pasteur Ruzibiza Viateur, uhagarariye Alerte Internationale , uhagarariye Umuryango DUHOZANYE n’abapadiri baza paruwasi zitandukanye.
▪ Umushyitsi Mukuru, nyuma yo gushima Padiri Mukuru wa Magi na Kiliziya Gatulika muri rusange ku bw’iki gikorwa, yasabye abashoje uru rugendo rw’isanamitima kwitwara neza bakabana neza n’abo bamaze kwiyunga, bakima amatwi amajwi yashaka kubasubiza inyuma ndetse no kuba intumwa nziza mu baturanyi babo batitabiriye uru rugendo.
▪ Umushyitsi mukuru yashimiye kandi Komisiyo y’ubumwe n’ubwiyunge, Alerte Internationale, DUHOZANYE, CARITAS Rwanda, Umuryango wa Bibiriya mu Rwanda n’abandi bose bafashije kugira ngo iki gikorwa kigende neza.