Kuri uyu wa 11 Mata 2023, nibwo mu Karere ka Kicukiro bibutse ku nshuro ya 29 Abatutsi biciwe I Nyanza ya Kicukiro. Iki gikorwa cyabanjiriwe n’urugendo rwo kwibuka rwatangiriye ku ishuli rya IPRC Kicukiro ahitwaga muri ETO Kicukiro, rugasorezwa ku Rwibutso rwa Jenoside yakorewe Abatutsi rwa Nyanza ya Kicukiro.
Uru rugendo rwo kwibuka rusobanura inzira y’umusaraba Abatutsi banyuzemo ubwo bari bamaze gutereranywa n’ingabo z’Umuryango w’abibumbye zari kuri ETO Kicukiro zikisubirira iwabo ari nabyo byatumye bajyanwa kwicirwa I Nyanza ya Kicukiro icyo gihe hakaba hariciwe Abatutsi bagera ku bihumbi bine (4000).
Iki gikorwa kitabiriwe n’abayobozi bo mu nzego zitandukanye harimo, Minisitiri W’ubumwe bwabanyarwanda n’Inshingano Mboneragihugu Dr. BIZIMANA Jean Damascene, Umuyobozi w’Umujyi wa Kigali Bwana RUBINGISA Pudence , Umuyobozi Nshingwabikorwa w’Akarere ka Kicukiro Bwana Antoine MUTSINZI ,Abayobozi batandukanye mu rwego rwa IBUKA , bamwe mu bahagarariye ibihugu byabo mu Rwanda n’abandi bayobozi mu nzego zitandukanye bunamiye bakanashyira indabo aharuhukiye imibiri y’Abatutsi biciwe i Nyanza ya Kicukiro ndetse banacana urumuri rw’ikizere.
Mu ijambo ry’ikaze ryatanzwe n’umuyobozi nshingwabikorwa w’Akarere ka Kicukiro Bwana MUTSINZI Antoine yongeye kwibutsa ko ibikorwa byo kwibuka bigomba kujyana no gutanga amakuru y’ahakiri imibiri y’Abatutsi bishwe ikaba itarashyingurwa mu cyubahiro , ati: “Turongera gusaba ababa bazi aho imibiri y’Abacu bishwe yaba iherereye ko batanga amakuru kugirango nabo bashyingurwe mu cyubahiro”.
Hatanzwe kandi ikiganiro ku mateka y’itegurwa n’ishyirwa mu bikorwa rya Jenocide yakorewe Abatutsi muri Mata 1994, iki kiganiro cyatanzwe na Ambasaderi NSENGIMANA Joseph agaragaza uko Jenoside yateguwe n’uko ingabo zari iza RPA zayihagaritse, ubu abanyarwanda bakaba bari mucyerekezo gishya.
Umuyobozi w’Umujyi wa Kigali Bwana Pudence RUBINGISA yasabye abarokotse gukomeza kwiyubaka kandi asaba urubyiruko kujya basura kenshi inzibutso za Jenoside yakorewe Abatutsi kugira ngo barusheho kumenya amateka y’U Rwanda no kubaka ejo heza hazaza bashingiye ku mateka y’Igihugu.
Dr, BIZIMANA J. Damascene Minisitiri w’Ubumwe bw’Abanyarwanda n’inshingano Mboneragihugu wari n’umushyitsi mukuru yagaragaje ko kuba abatutsi bahungiye kuri ETO -Kicukiro baratereranywe n’ingabo za LONI atari bwo bwa mbere kuko u Rwanda rwatereranywe n’amahanga kuva mu bihe by’ubukoroni asaba urubyiruko guharanira kwigira no kuba abambere mu gukorera u Rwanda.
Minisitiri Dr. Jean Damascene BIZIMANA yunamira Abatutsi baruhukiye ku Rwibutso rwa Nyanza ya Kicukiro.
Umuyobozi w’Umujyi wa Kigali Bwana Pudence RUBINGISA yunamira Abatutsi baruhukiye ku Rwibutso rwa Nyanza ya Kicukiro.
Abitabiriye Kwibuka ku nshuro ya 29 Jenoside yakorewe Abatutsi i Nyanza ya Kicukiro.